امسال رمضان کیسا ہوگا؟. RAMDHAN 2021

 بسم اللہ الرحمن الرحیم

از قلم:- محمد عثمان ابنِ سعید بمبوی

متعلم:- عربی اول جامعہ اسلامیہ تعلیم الدین ڈابھیل سملک

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

واہ اے حکومتِ ہند تیری سوچ!!!

         

          ایک طرف ١ اپریل ٢٠٢١ سے ٣٠ اپریل ٢٠٢١ تک مسلسل ایک ماہ ہَرِدوار میں کنبھ میلا لگے گا جہاں لوگوں کا ایک جمِ غفیر جمع ہوگا لیکن وہاں چونکہ حکومت کی حمایت ہوگی اسلئے کورونا کا اس جانب رخ کرنا ناممکن ہے اور دوسری طرف رمضان المبارک کے مہینے میں مسلمان تراویح کے لئے مسجد میں جمع ہوں گے تو حکومت کی ناراضگی شاملِ حال ہونے کے سبب کورونا کا یہاں آنا ناگزیر ہوجائے گا۔   

          ہماری حرماں نصیبی کہیے یا بداعمالیوں اور کوتاہیوں کا صلہ کہ گزشتہ سال کی مانند اس سال بھی کورونا وائرس رمضان المبارک کا استقبال کرنے آگیا، یہاں کسی سے کیا گلہ کریں کہ ہم نے اپنے پاؤں پر آپ کلہاڑی ماری ہے۔ کسی کو کچھ کہنے کی ضرورت نہیں، ہر شخص اپنے گریبان میں جھانک کر دیکھ سکتا ہے کہ ہم اس سال مسجدیں کھلنے کے بعد کتنی مرتبہ مسجد گئے اور اگر جاتے بھی تھے تو ہم کتنا عرصہ مسجد میں گزار پاتے تھے؟ 

 

مسجد تو بنادی شب بھر میں ایماں کی حرارت والوں نے

من اپنا پرانا پاپی ہے برسوں میں نمازی بن نہ سکا

          خیر جو ہوا سو ہوا، صبح کا بھولا شام کو گھر آجائے تو اسے بھولا ہوا نہیں کہتے، اب بھی وقت ہے کہ ہم توبہ کرلیں اس رب کی دہلیز پر جھک جائیں جہاں جھکنے والا ایک نہ ایک دن اوپر اٹھ کر رہتا ہے ۔

باز آ باز آ ہرآنچہ ہستی باز آ

گر کافر و گبر و بت پرستی باز آ

ایں درگہِ ما درگہِ نومیدی نیست

صد بار اگر توبہ شکستی باز آ

نیز ہر شخص اپنے تئیں یہ عزمِ مصمم کریں کہ انشاءاللہ ہر نماز مسجد میں باجماعت ادا کروں گا کہ نیکی کا ارادہ بذاتِ خود ایک نیکی ہے۔

          ساتھ ہی بطور اسباب کے اگر مساجد میں ماسک کا اہتمام اور صابن و سینیٹائزر کا مناسب انصرام ہو تو شاید ہمیں متفکر حکومت کی شفقت و مہربانی کا بار اٹھانا نہ پڑے۔ 

           ایک لمحہ کے لیے چشمِ بصارت بند کردیں اور چشمِ تخیل وا کرکے سوچیں کہ رمضان میں مسلمان مسجد کے نورانی ماحول سے محروم ہوں، مسجد الحرام خالی ہو، مسجد نبوی کی خنک خنک فضا پر سناٹا چھا جائے تو دل لرز جاتا ہے، دماغ مفلوج ہو جاتا ہے، ذہن ماؤف ہو جاتا ہے، رونگٹے کھڑے ہو جاتے ہیں، روح کانپ اٹھتی ہے اور اوسان خطا ہو جاتے ہیں۔ 

          لہذا دربارِ ایزدی میں ہمہ وقت خصوصاً آج شبِ برات میں رورو کر، گڑگڑا کر، تڑپ تڑپ کر اور بلک بلک کر بھیک مانگنے کی ضرورت ہےکہ 

          یا الٰہی! ہم گنہگار و خطاکار ہیں، لیکن آپ کی ذات تو آمرزگار ہے، ہمیں اپنے گھر آنے سے نہ روکیں، خصوصاً رمضان میں ہمیں مسجد والے ماحول سے محروم نہ کریں!